mai ki te whakanui i te rā o Te Ariki Tapairu, o Te Atairangikaahu. Ko ngā kapa i tū i aua ra e rua tekau mā toru.

Ia tau he tuārangi anō ā Waikato, ā, i tēnei tau ko Te Pirīmia, ko Norman Kirk, rāua ko Whetū Tirikātene-Sullivan ngā tuārangi mo te rā. Kei te mōhio hoki koutou he nui tonu ngā rangatira o te ao whānui kua whakamanuhiritia e Waikato ki runga i tō rātou marae ataahua. Ko ētahi o aua manuhiri ko Te Kuīni o Ingarangi me tana tane, ko te tāne ā Te Kuini o Hōrana, ko te tama ā Te Kingi o Tiapani rāua ko tane wahine, tae atu ki Te Tumuaki o Amerika, arā, ki a Richard Nixon. He tokomaha ngā manuhiri rongonui ā ngā iwi o Waikato kua manaakitia, kua whakarangatiratia e rātou i runga i tō rātou tipuna marae.

Kaati ra, ko ēnei kōrero nā tētahi e titiro whakamīharo nei ki te iwi o Waikato me tō rātou rangatira e manaaki nei rātou i te ono ki te tekau mano tāngata ia tau, ia tau, i runga i tō rātou marae, i a Tūrangawaewae. Ko tēnei mea ko te āroha nui ki te tangata ka kitea ki konei no reira, e kare mā, tēnā koutou katoa mo ā koutou manaakitanga maha.

Ko ngā kupu i waiho ai au hei ūpoko mo ngā kōrero nei no roto mai i tētahi manawa wera i titoa e ngā wāhine o Ngāi Tūhoe ki Ruatāhuna. Ko te nuinga o ngā wāhine nei i pouarutia i te haerenga mai o ā rātou tāne ki te āwhina i a Waikato i te wā o te pakanga nui i tū ki Ōrākau. Nō te hokinga atu o ngā tāne i waimarie ki te ora tonu ki Ruatāhuna, ka haka mai ngā wāhine rā i tā rātou haka, ā, koinei ngā kupu tīmatanga,

‘I hoki mai koe e Te Whenua-nui ki te aha? Tē mate atu ai i te unuhanga o te puhi o Mataatua? Ka mahora ki te riu ki Waikato, ki te aroaro o Maniapoto …’

Waiho rā, e rau rangatira mā, mā ngā kupu o tēnei haka ā ōku tīpuna e kawe atu ki a koutou te kaha whakamihi atu ā tēnei tamaiti o Ngāi Tūhoe ki a koutou. Mā ngā kupu o tētahi o ngā whakataukī i whakarērea mai ki a tātou e whakaata ōku whakaaro ki a koutou,

‘He kokonga whare e kitea;
he kokonga ngākau e kore e kitea.’