Go to National Library of New Zealand Te Puna Mātauranga o Aotearoa Go to Te Ao Hou homepage
No. 73 (July 1973)
– 49 –

Personal Qualities of
Successful Maori People

E mohio ana tatau ki ngā tangata mātau o te iwi Māori, kua tū, arā, kua rongonuitia i ngā mahi ā iwi, kua noho i ngā turanga nunui, kua whiwhi hoki i ngā taitara e whaia nei e te Pākehā.

He nui aua tāngata kua eke ki ēnei taumata hōnore. Tuatahi tonu, ko Tā Apirana Ngata, me Tā Te Rangihiroa Buck, ko te Pihopa tuatahi o Aotearoa, ko Pihopa Pēneti, ko Tā Maui Pōmare. Koi nei ra ngā tāngata, me ki ake e au, o roto i te ao tahito i rongonuitia.

Ko ō rātou kaha ā—tangata, nā te ngākau nui ki te kura, nā te nui roro, ka mau te reo o te Pākehā hei tāpiri ki tōna reo ake. Kāti i konei, ki te ao tahito.

Ka huri aku kōrero ināianei mo te whakareanga tangata o tēnei wā, i rongonuitia ai e Te ao katoa. Tuatahi tonu ko Moananui-a-Kiwi Ngārimu V.C. He uri rā, no ngā rangatira o te iwi nei o Ngati Porou. I kuraina i Te Aute Kareti. I muri mai ka haere ki te pakanga tuarua. He Apiha tōna turanga, arā, tetahi o ngā kai—ārahi, o te iwi Māori i te whawhai. I konei ka kitea te whānui pakihiwi o tēnei tangata, te ihi, te wehi, te kaha, me te tuku i tōna tinana mo tāua mo te iwi Māori e ora nei. Whakawhiwhia ana hoki ki te ripeka o te wikitoria, he honore nui kia ia, ki te iwi Māori. Hei whakamutu ake i aku kōrero, me whakahua ake au ia Kiri Te Kanawa. Kua rongo whānuitia tēnei wahine e te ao, mo tōna reo reka ki te waiata, a kua eke hoki ki ngā taumata mo tēnei mahi, e whaka-manamana ai tāua te iwi Māori. E Kiri, Moana, no kōrua ngā hōnore, ka uwhi mai kia mātou katoa.

Ameria Ponika

Winner, Form V Section, 1972