I noho ki Wairata ko Taiatea rāua ko tōna tuahine, ko Hine-Tokatā. Ko Wairata kei te pito whakarunga o te one o Punaruku.

Ka pāngia a Taiatea e te mate, ā, i te taumaha o tōna mate, kua kore a ia e kaha ki te mārangaranga ki runga. He rite tonu tana tangi wai unu mōna, te wai o Taranaki. Ko tēnei wai he puna kei Whakaoramate, kei roto whenua; he wai rongonui, ā, e waiatatia ana i roto i ngā waiata a te Māori. E tata ana ki tētahi puna anō, ko Tukuroimata te ingoa. Ka rere mai te wai o te puna o Tukuroimata, ka tūtaki ki te wai o te puna o Taranaki. Ka rere tēnei wai whakawaho, ka tūtaki atu ki te wai o Oruakarahea, i rere mai nei i te Pōhatu-a-Tamapikotahi; i konei, kua kīia tēnei awa ko Waingaue, te putanga atu ki te moana tata tonu atu ki Wairata.

I te hotu o te tangi a Taiatea, ka pōuri tōna tuahine, ka mea atu ki a ia, ‘Kāti tō tangi; e haere ana au ki e tiki wai mōhou i te puna o Taranaki.’

Ka mau a Hine-Tokatā ki ōna tahā, ā, ka haere i te pō, mā roto i te awa o Waingaue, tae noa atu ki te puna o Taranaki. Ka whakakī i ōna tahā, ā, ka huri te aroaro mō te hoki ki tōna tungāne, ki a Taiatea, kei Wairata. Kāore a Hine-Tokatā i hoki mā roto i te awa o Waingaue, i te mea kei te haere mai te awatea. Kātahi a ia ka poka tata atu mā te tuawhenua.

Kāore a ia i tae ki tōna tungāne. Ka mau i te rā, kātahi ka hurihia hei pōhatu. E anga tīraha mai rā me ana tahā i tēnei rā, kei waenganui i ēnei roto, Te Rewa rāua ko Te Whakamarumarunga.