Go to National Library of New Zealand Te Puna Mātauranga o Aotearoa Go to Te Ao Hou homepage
No. 62 (March 1968)
– 59 –
 

Ka mutu te kai ahiahi, ka haere te Minita me tana hoa wahine ki te parāni i waho o te whare okioki ai. Nā, kua tae mai a Rau. Ka tū i mua i a rāua, me te pēke huka nei i roto o ana ringaringa. A, ka waiho ki raro, he horihori tonu tēnā pēke.

Ka mea atu te Minita nei ki a Rau, ‘He aha tāu mea i roto o te pēke huka nei, e Rau?’

He nui te puku kata o Rau i a ia e whakapuare ana i te pēke nei, ā, ka mea atu, ‘He tuna waiata tāku.’

Kātahi ka whakapuaretia te pēke, me te kōkiritanga ake o te tuna nei ki waho. Ka whakahokia anō e Rau ki roto i te pēke, me tana puku kata hoki. Ka mataku te wahine o te Minita nei.

A, ka mea atu te Minita, ‘E Rau, he aha koe i mea ai he tuna waiata tēnā? Hore anō ahau i rongo i tēnā mea i te tuna e waiata ana.’

‘Kāhore, e Minita, e tino mōhio ana ahau he tuna waiata tēnā. Kei roto o tana puku kī tonu i te waiata.’

Ka mea atu hoki te wahine o te Minita nei, ‘Ae, e Rau, ēngari he aha koe i mōhio ai e waiata ana tēnā tuna?’

Ka titiro atu a Rau, ā, ka mea, ‘He tuna waiata tēnā. Nāku hoki te manu waiata rā i kohi ki roto o te pēke nei, ā, ka pangaa e au ki roto o te awa tuna i roto rā. Kāhore kē i tanumia e au. Kātahi ka tomo mai te tuna nui nei ki roto. Nā reira tēnā tuna, kī tonu tana puku i te waiata.’

I wā Rau anō! He tamaiti iti noa iho anō ia. Kāhore he tino mōhiotanga, ēngari he tino tamaiti mōhio ki te hī tuna.

Picture icon

Rau waits a long time