Go to National Library of New Zealand Te Puna Mātauranga o Aotearoa Go to Te Ao Hou homepage
No. 56 (September 1966)
– 5 –

He Reo Poroporoaki mo
KOROKI TE RATA MAHUTA
TAWHIAO POTATAU TE WHEROWHERO
Te Taurima o nga Kiingi o te Iwi Maori

I moe i te moenga roa i te ata-po o te Wenerei, i te 18 o Mei, 1966. I nehua ki Taupiri Maunga i te 23 o nga ra. Ona tau e 60.

Haere e te Ki tua o Paerau!

Haere i runga i o Waka! Haere i runga i nga maunga korero a o tupuna e moe nei i te whenua!

Kua rewa atu to waka na roto atu i to awa i Waikato; he wai pounga hoe mai no o matua!

E huri to kanohi ki te Hauauru, ki Whaingaroa, ki Aotea, ki Kawhia: ka ahu mai, e te Ariki, to tira i te ara ma uta ki runga o Maungatautari, ki te hikonga uira i runga o Wharepuhunga, i Rangitoto — nga tohu ra ena a o tupuna.

Takahia e koe te ara ki Rotorua nui a Kahu; kei kona nga wai ariki a o tupuna o runga i a Te Arawa; ko to ara tane mai, e Tama, i a Tamatekapua.

Taiawhio te haere i runga i o Waka i a Mataatua, Horouta me Takitimu kia mihia mai koe e nga uri a o tupuna; a Toroa, a Porourangi, a Kahungunu.

Whakamau mai ma te Upoko o te Ika ki o kawei maha, piki mai ma runga i ena o o Waka i a Kurahaupo, i a Aotea, i a Tokomaru.

Kei Parininihi mau e maianga mai ki Mokau kohu nui, ki Mangatoatoa, ki Tamaki makau rau.

Ahu atu to tira ki te tai ki te muri, ki te Tai-tokerau; ki o tupuna o roto i nga toronga maha mai i a Te Rongopatutaonga.

Ka whakangaro atu ai koe, e te Kiingi, ki tua o Morianuku.

Haere te Puhi o Tainui!

Moe mai i runga o Taupiri, i te Urunga o te Kahurangi ka oti atu koutou te rarangi Kiingi ki te Po!

Takina mai ra ngā Huihui o Matariki;
Puanga, Tautoru, ka ngaro Atutahi;
Ma and e whakarewa te tini whetu riki,
Ka rewa kei runga!
Pūhia e te hau ki runga o Moehau.
Ka ngaro ia i te rehutai!
Tēnā, e te iwi, taku kura tangi-whakaingoingo
Te whakaangi atu na!
Waiho kia haere, he toroa awe nui
E topa ana ia ki te muri!
I unuhia noatia taku hou kōtuku
No runga rawa ia
No te pae tauārai kei ōna tūpuna.
E hara i te tangata;
He kuru tonga rerewa kātahi ka unuhia
I roto i te whare o Hoturoa.
I tirohia ano ka hiko te uira
Ki runga o Taupiri!
Ko tou tini ra te taka mai ra
I ngā mānia kei Tangirau
Ko te matamata i torona atu
Mo koutou ko o iwi e moe mai na
E Pa, e!

A Lament by Potatau Te Wherowhero (before he was elected the first King of the Maori people) on the death of his brother, Kati.