Go to National Library of New Zealand Te Puna Mātauranga o Aotearoa Go to Te Ao Hou homepage
No. 54 (March 1966)
– 6 –

Maua Ko Toku Hoa

Turori ana maua ko toku hoa a,
Tihohi ana ra i te takutai one
Ko te Akutoru.

Kia ara ra, i kia ara ra,
Mai koe e tu,
Te ariki mai tuamotu,
Kahui ariki, kahui po, kahui katoa,
Tihei mauri ora.

Piki ana maua ko toku hoa
Te puke i Apiri,
Ko te marae tuatahi.

Patu mai ana te ahu kamaka,
Oha tapu o Tane.
Ki a Io-te-korekore.

Tere ana maua ko toku hoa
Ma te moana,
Ko te wahapu, Tokota,
Mana whakahirahira,
Kia rarata hoki e.

Rewa ana maua ko toku hoa
Ma runga o Manurewa,
Tau ana.
Ko Porapora i te hoe o nuku,
Te oe o Whiro,
Waka taua,
Te pupu ura o te whare
Tau ana
Kei roto o te awa nui.
Hikoki ana maua ko toku hoa
Ko Whangaroa.
Hei aha koa, e kore e mate,
He kakano i ruia mai i Rangiatea.

Te paepae o Turi e, tena koe,
E Turi e, tane purotu,
E Turi e, tane makaurau.

Whiti ana ra maua ko toku hoa
Ki Opoa whenua ariki,
Opoa marae tapu.
Whiro tupuna,
Maro ura, maro tea e,
Hui e, taiki e.
Ka tere ra te waka a maua ko
Toku hoa ki waho a Nguturoa,
Ko Tahea.

Maungaroa, ko Waimate.
Titiro whakarunga.
Ko Whiro tupua e rarapa kau
Ana ki te toka e,
E kia tupato ra te hoa ki Hiipu,
Ko te whare mango i,
Ka mau te wehi wehi!