He Poroporoaki

na Tiare Moihi Peneti

I te ora tonu te tangata ka paku ohorere mai te rongo kua hinga tenei totara nui ki te wao a Tane; kua kore tenei whakaruru hau o nga manu o te rangi; kua to tenei whetu marama; kua takitahi nga whetu o te huihui o Matariki; kua hinga te pou tokomanawa o te whare whakairo a kua noho pani te iwi.

Hoani Waititi, e hoa haere ki te iwi, haere ki o tatou tupuna, haere ki te whanau a Tumatauenga. Haere ki te Kainga tuturu mo te tangata.

Kua hoki koe ki Tawhitinui, ki Tawhitipamamao, ki te Hono-i-wairua. Kua maunu koe i runga i te waka o tenei tangata kaha o Aitua. He mea waihanga i roto i nga pouritanga maha o tenei ao. Kua whiti koe i nga moana tuauriuri ki te po.

He tokotoko toa, kotahi he turanga; he tokotoko rangi, ka ngaro te kai a ka mate te tangata. Aue! te pouri, te tangi e!

Haere, haere, haere!