Go to National Library of New Zealand Te Puna Mātauranga o Aotearoa Go to Te Ao Hou homepage
No. 53 (December 1965)
– 52 –
 

HE HAERE, TAIAWHIO TE AO

I timata mai enei korero i wharangi 16

ao, a ka tae ki te kainga e haerengia ra e matou.

Na, me whakararangi nga mahi i mahingia e matou:

E 38 nga nupepa o te ao i haere ki ahau he patapatai mai mo tatou te iwi Maori.

E 20 nga T.V.

E 29 nga reo takiwa (radio).

E 95 nga kapa haka, waiata, i tu i a matou (performances).

E 56 nga huihuinga i manaakingia ai matou (receptions).

E 14 nga hotera i noho ai matou; e rua nga kainga o te Haahi i noho ai matou.

I whakamaungia te honore ‘honorary citizens’ ki runga i a matou ki Winnipeg me Brandon.

Ko ahau e ki ana, ko tenei tetahi haere nui whakaharahara, he haere rangatira ataahua hoki. Taiawhio te ao i a matou, e waiata haere ana, e haka haere ana, e whakaatu haere ana i nga taonga i whakarerengia ake ai e o tatou matua, tupuna. Ahakoa te tono mai a nga tauiwi kia whakarite atu matou ki nga wahine, ki nga tangata o Hollywood, kotahi toni taku whakahoki. He Maori tuturu matou; ko a matou mahi e mahingia e matou, ka tau ano ki ta te Maori. Kahore rawa ahau e whakaae kia whakataurekarekangia nga taonga Maori. Ki te kore koutou e whakaae ki taku, pai ke to matou hoki ki te wa kainga. Haere ana matou, mahi ana, i raro i te mana Maori, me te tutuki pai o nga mahi, me te nui hoki o nga manaakitanga me nga honore i uhingia ki runga i a matou.

Kua hoki mai ra ki te wa kainga. Kua rongo i nga aitua, i nga mate huhua o te motu. Haere e nga mate; haere ki te kainga e au ai ta koutou moe. Haere, takahia nga tapuwae o te tini o te mano, kua huri ki tua o te arai. Haere ki nga rangatiratanga, ki nga mana, nga pukorero o nga hau e wha kua mene ki te po. ‘Toitu he kainga, whatu nga-rongaro he tangata.’ Ko koutou tenei kua haere; ka ngaro koutou, nga kaipupuri o te Maoritanga, nga kaihapai i nga mahi—e rau rangatira ma, haere, e moe i roto i te Ariki.

E nga iwi katoa: e nga hau e wha o te motu: tena koutou katoa mo a koutou manaakitanga maha i a matou i haere atu ai, i hoki mai ai, i runga i te rangimarie me te aroha tetahi ki tetahi.