ma Ngata raua e tiaki, a ma te mate rano raua e whakahoki mai, ka haere raua hei matua mo nga tamariki o te iwi Maori. Katahi ka tapaea ki te taonga. No tetahi rangi mai ka haere matau ki Rotorua, ko nga tangata ako ki te whakairo o te Kura e tauwhanga mai ana, a, ka manaaki ratau i nga kaumatua nei. No muri noa mai ka manaakitia raua e nga kaumatua o Te Arawa.

Kaore i ra tahi te whakanohanga o Eramiha ki to raua kainga kua ki mai kua hiahia ia ki te timata ki te ako i a matau. Ka koa katoa matau. Mai i te whakakoi toki tae noa ki nga ara maha o te tarai ki runga porototara, tae noa atu ki te tarai ki runga whakairo, apiti ki nga kupu e tika ana mo tena wahanga mo tena wahanga, ka piki haere ke atu to matau kaingakau ki ta matau mahi, ia ra, ia wiki, ia marama, a ka kite ka mohio hoki au ki taku kuaretanga ki te whakairo.

Ehara a Eramiha i te tangata whakatapu i tana mahi tarai ki runga ki te whakairo, ko te hua, ka tauwhawhainga matau ki te whai o ana tohutohu i ana hanga, a pau rawa ake te tau, i mua i to matau haerenga ki Ngapuhi ki te whakairo i te Tiriti o Waitangi Whare mo te rau tau o Niu Tireni, ka whaikupu a ia ki a Ngata, kua taea e te kura te mau o te toki kapukapu ki runga whakairo, kei te koa ia ki tena ki tena o nga tamariki, haere rawa ake ki runga ki nga iwi ma ratau tonu e ako nga mea e pirangi ana ki te ako. Ka mihi hoki a Apirana ka ki atu, “E Miha ina a taua tamariki, haere koutou ki nga iwi o te motu.”

Tekau tau maua ko Eramiha e mahi tahi ana i runga i nga marae maha o te iwi Maori, a, i roto i ena tau e rua tekau ma wha nga tangata nana i ako no nga iwi katoa o te motu, no Ngapuhi, no Ngatiporou, no Waikato, no Ngakikahungunu, no Ngati Raukawa, no Taranaki, no whanau-a-Apanui. Ko Eremahia te tohunga whakamutanga o te oa tawhito, ka waimarie nei matau, nana hoki i whakaatu te huarahi ki te tarai i te taitea o te rakau kia tu ko taikaka, ki te whakatakoto i te ara haratua, ki te mau haere i te ngaotu i te ngaopae, ki te poka hoki kia tarewa ai te poka o te arero i runga i te whakairo, a haere atu he whare whakairo i runga i te motu ko te ha o tona akonga i a matau e waitohu ana.

Haere e Miha, kei muri nei to taonga e takoto toitu ana i roto i nga ringa o tamariki maha puta noa te motu, engari haere atu korua ko te Wairata me a korua patere, waiata, oriori, whakakoemi, whakangahau i te paopao a te patupatu ki runga i te whao, ko enei a korua taonga kaore i taea e te rangatahi—Haere korua haere.

Pine Taiapa 21.6.59