WHAKATAUAKI

Kaua e patu aruhe i te po, he upoko tangata, he tohu aitua.

E ai ki nga korero o mua, he tohu kino te patu aruhe i te po, kei anga te tangata ki te patu aruhe, ka rokohanga e te taua, ka patua ke ko tona upoko.

Ka ora karikari aruhe, ka mate takiri kaka.

He whakatauki tenei mo tenei kai a te Maori mo te aruhe. I te nui o tenei kai, e kore e roa kua ki te kete. Na ka whakarite te kai nei te aruhe, ke te kai nei ki te manu kaka. E kore noa e roa, ka whiwhi aruhe te tangata, tera ia ko te tangata patu kaka, ma tona maia, ka whiwhi manu ai ia.

“E raro rawakore, e runga, tinihanga.”

Ko te ahua nei, no te Taitokerau tenei whakatauaki. Ko te “tinihanga” e whakahuatia nei, ehara i te maminga, engari he maha no te taonga, no te kai hoki. Ko nga pounamu, no te taha whaka-runga katoa. Ko nga taonga ataahua katoa a te Maori, ko te nuinga no te taha whakarunga. Ka takoto te korero nei hei kupu whakarite, ara he kupu whakaiti na te Taitokerau. He rawakore te taitokerau, he rangatira te tai whakarunga.