Go to National Library of New Zealand Te Puna Mātauranga o Aotearoa Go to Te Ao Hou homepage
No. 26 (March 1959)
– 4 –

TE HAERE
KI AWHERIKA

Haruru ana te motu i nga korero tautohetohe me haere ranei he Maori i roto i te tiima whutupaoro ka haere nei ki Awherika a te tau 1960 me kaore ranei. Na te nui o tenei take ko tenei upoko korero mo ta tatou pukapuka. Kua tirohia nga korero a nga nupepa na reira e tika ana me whai kupa hoki a Te Ao Hou.

Tuatahi he oranga ngakau te kite iho i te tokomaha o te hunga kei te whai kupu mo tenei take. Kua whai kupu te hunga tautoko i tenei takaro i te whutupaoro, kua whai kupu o tatou hahi na reira kei te tauwhanga te ao katoa he aha te whakautu a Niu Tireni Pakeha. Ko te whakaaro kaua e tukua kia takoto noa tenei take i runga i tera korero “Tatou tatou”

I roto i enei tautohetohe kei warewaretia nga tino take ara ia kei te matakitaki mai te ao ki te tauira o te noho pai a te Maori raua ko te Pakeha. Kei te mihi te ao i te mea kua whakaturia he Maori hei mangai mo Te Kawanatanga ki Malaya. Ka nui hoki te whakamihia o te pai o te noho ara te pai o nga ahuatanga katoa e pa ana ki te Maori. Mehemea i roto o tenei rua te kau tau e tu mai nei ka taea te hanga he whare totika mo te nuinga noa iho o te Maori, a ka kitea he rongoa mo te whati nui ki nga taone ka pera rawa atu nga mihi.

He aha rawa ra te rongoa mo nga makenu o te Maori? Kei te Maori tonu te nuinga o te rongoa a ko ta te Pakeha he aroha he awhina haere. Koia nei ta te Te Tari Maori tana kite, ngakau nui atu [ unclear: ] e Pakeha ki te awhina haere i te Maori tohunga ki te mahi. Ko te taha whare noho te mea uaua, mehemea e aro mai ana te Pakeha ki te awhina. ina noa ia ki te tuku mai he whenua hei tuunga whare e kei whea mai he huarahi hei whakamaheni i nga putiotio kei waenganui i te Maori raua ko te Pakeha.

Ko te tumanako kia mutu pai noa te tautohetohe mo te uru o te Maori ki te tiima haere ki Awherika a ko te hua nui he whakamatatau i a tatou ki te ao nui tonu.