He waka eke noa.

I nga wa e mau tonu ana te mana o te Maori, ko nga taonga katoa, he taonga na te iwi, na te hapu ranei. Kahore he taonga na tetahi ake tangata, otira, e ki penei, he ruarua nei nga taonga e aheingia ana te ki, na tetahi tangata ake. Ko nga whare, no te iwi; ko nga waka, no te iwi, a me etahi atu ahuatanga hoki. Na, ko te nuinga o nga taonga Maori, he tapu. Ko te whakatauki nei, mo tetahi taonga kahore ona tapu. I whaka-ritea ki tetahi waka, hei ekenga mo nga tangata katoa, haunga ia nga rangatira, nga tohunga me nga tangata whai mana. “He waka eke noa”, ara, he taonga ma te katoa.

He kura tangata, e kore e rokohanga, he kura whenua, ka rokohanga.

He kura kainga e hokia; he kura tangata e kore e hokia.

E rua enei whakatauki, he rite tonu, engari ko te whakatakotoranga o nga kupu, he rereke. Ko tetahi ano rerenga o enei whakatauki ko tera e mohio whanuitia ana, ara: “Whatu ngarongaro he tangata, toitu he whenua.” He maha nga whakatauki mo te whenua te take. Ki te kore he whenua o te tangata, kahore a ia e kiia he tangata. he rite tonu te hingahinga a te tangata. I tena ra, i tena ra, ka mate mai he tangata; engari ano te whenua, tu tonu. Na te whenua nga pakanga nunui o te motu nei, he tohe no te iwi Maori kia mau tonu o ratou whenua, ake tonu atu. Kua tuhia nga haka mo nga ture whenua. Kei roto i aua haka e mau ana nga korero teitei mo te kaika o te iwi Maori kia mau pumau o ratou whenua. E ki ana ano hoki tetahi korero, ki te ngaro te whenua, ka ngaro te mana.

He potiki whakarihariha.

Ki te korero a etahi, ko te tamaiti whakamu-tunga a te tangata, te tamaiti, tutu, hianga a, mohio hoki. Mona te korero nei, “he potiki whakarihariha”, a, ko tetahi rerenga ano o te korero nei, “He potiki whatiwhati toki” mona i tutu ka tahuri ki te toki a tona matua, ka tapahi noa, na wai ra, puhuki te toki!

Ehara ta te tangata kai, he kai titongi kaki; e kore e rite ki tana ake, tino kai, tino makona.

Ko te kai na te tangata ake i mahi, makona ana a ia; tera ko te kai i te kai a tetahi atu tangata, timotimo noa te kai, kahore he reka, kahore e makona.

Kai kino ana a Te Arahe.

Ko Te Arahe, he kuia amuamu, na ko nga korero mona, ka kai ana i ana kai, ka riro i a ia nga kai ataahua katoa. Ko nga kai kore take, ka hoatu e ia ma tana tane me a raua tamariki. I etahi wa, ka kainga hunangia e ia ana kai, kei kitea mai a ia e te tangata e kai ana. Ko tenei whakatauki inaianei, mo tetahi tangata amuamu.