Go to National Library of New Zealand Te Puna Mātauranga o Aotearoa Go to Te Ao Hou homepage
No. 25 (December 1958)
– 4 –

TE AO HOU
KO TA TE AO TAWHITO

He aha ta nga kaumatua i ki ra ko te pakaritanga o te tangata kei te wairua o ona tipuna Maori? Tera ano tenei e tika? Ko ta te tangata kei te kite iho i te noho a te Maori i nga taone ki, ka penei na, ka nui te taikaha o te noho taone ki te tangata ahakoa tamariki, hei reira ka hoki nga whakaaro ki ta nga kaumatua, a ka raparapa nga whakaaro ki to ratou Maoritanga.

Ka taikaha te noho i [ unclear: ] nga taone ka konohi nga whakaaro ki nga mahi Maori. Mehemea he tangata whai whakaaro ka haere ki te korero i nga pukapuka mo nga mahi o nehe ra. Ahakoa ra kaha te konohi o nga whakaaro ki nga mahi Maori ki nga taonga Maori ka mau tonu ki nga mahi Pakeha hei oranga mo te tinana, ko nga mahi Maori hei whakaahuru i nga whakaaro.

He aha tenei Maoritanga? Ehara i te Maoritanga e kitea nei e te whatu, engari ia ko te wairua hohonu o te Maoritanga, ko te ihi ko te wana o nga tipuna kua mene kei te po. He takitahi nei tenei momo tangata e kitea e nga taitamariki noho taone a ka kite ana rere tonu mai te wehi me te ihi.

I mua ko nga korero mo nga mahi o namata te kinaki o te noho a te tangata a te kaupapa o nga mahi. Kua ngaro te tangata a ko nga pitopito korero kei te pukapuka a Kawana Kerei—Nga Mahi a Nga Tupuna-tetahi huarahi ki te wairua o te hunga kua mene kei te po. Kei taua pukapuka nga korero mo Hatupatu, mo Turi, mo Manaia o te Maori ona tipuna. Mau ana te wehi o nga mahi a aua tipuna, otira ko te kaupapa tera o te Maoritanga.

Ka nui te oho o te wairua ki te pupuri i te Maoritanga a e tika ana kia hohonu ano te hoki o nga whakaaro ki te tuturutanga o te Maoritanga.