Go to National Library of New Zealand Te Puna Mātauranga o Aotearoa Go to Te Ao Hou homepage
No. 18 (May 1957)
– 3 –

HEI TE TAU 2000

Kua Puta te korero ki te penei tonu te haere o te piki o te tokomaha o te iwi Maori tae rawa ake ki te tau 2000 kua eke te tokomaha ki te 400,000. Otira ko wai ka hua ko wai ka mohio ki nga ahuatanga mai atu inaianei ki tera wa. Kei tika noa atu pea te eke o te tokomaha o te Maori ki te 400,000 na reira me whakataunga tatou ki te ahu pera nga whakaaro ki te 400,000 te tokomaha meake nei.

He waimarie tatou ahakoa penei te kaha o te tipu a te tangata kaore noa iho he maharahara. Kei etahi wahi nui tonu o te Ao (penei me Haina me Inia) he mea mataku te piki o te tokomaha o te tangata. Ka whanau he tangata ki te ao ka harakoa tatou nei, ki era iwi kaore, he mea maharahara ke ma wai ra e whangai.

Ka nui nga wahi watea ka nui te mahi kei Niu Tireni nei na reira ko te tumanako kia hua kia tini te tangata. Kei piki te tokomaha o te Maori ki nga wahi kore mahi.

Ko te ahua nei ko te nuinga o te 400,000 o te tau 2000 nei tera e whati ki nga taone noho ai ka whakarerea nga takahanga waewae o ratou tupuna. Kua timata nui tonu te whati o te Maori inaianei ki nga taone e ako a ko ake nei ka pera ke atu. Ko etahi ano pea ka noho ki nga taone mo te wa poto ka kawea e te aroha ka takihokihoki ki te wa kainga.

He hanga pai te rongo ake i a Manu Peneti e korero ana i te Hui Topu a Nga Hahi i tu ra ki Otaki ka nui te pai o te noho a te Maori kei nga taone. Kei wahi ke o Te Ao Hou te roanga atu o nga korero a Manu. Otira ahakoa te pai me ata tiaki ano nga tamariki e whati nei ki nga taone. Me timata mai nga awhina i te kainga haere rawa ake ki nga mahi taone kua totika.

He pai tonu te haere ki nga taone engari me whakapai te noho mai i te kainga.