TE TAKUATE
A KAWITI

Due to an unfortunate slip, the text of this song was incorrectly printed in our last issue (p. 44). We hereby make amends.

Kahore te mamae e waahi ake nei,
E whakapatu ana te tau o taku ate e,
Ki te iwi ra ia kua hurihia atu nei
Ki raro i te maru o te Kuini ee
Hei hapai mai i te patu a ware ee
Ki runga ki taku kiri ngarahu e,
Te ngu o taku ihu e whakamaua mai ra.

E tini e te hoa, kia waiho ko ahau.
Hei matangohi mo roto i te pakanga?
I mahara hoki au ee hei riri kotahi ee,
Hei riri pupu te riri a Ngapuhi, te riri a Rahiri ee,
Te riri a Kaharau,
Kia tohia iho ana ki te tohi o te riri,
Ki te tohi nei o Karakawhati ee
Ki runga ki te kauae o te riri ee,
Hei huna i te tangata ee ki te po nui o Rehua ee i.

Tenei ka whakaohirangi te tapu i te tinana,
Te tapu i te whenua ee, e titiro ana aun e
Nga hau e wha o runga o te rangi ee.
Tenei ka tukumai ko Ngaitai ko te mere whakakopa ee
I te hauauru he tai tama tane e
Ko te maroharanui, ko te ripoharanui i waho o Mapuna,
E tangi ana ia he mumutai he wawa whenua e …. i.

Kia too te marino ki roto o Hokianga
I tupu mai i Panguru i Papata ee …. i.
Nga puke iringa korero o te hauauru ee
Ka tere te tai tapu, te kauanga o te rangi,
He au maunutanga-toroa, he hurihanga waka-taua
Ki te riri tauaki, ki te riri horahora ee,
Ki te riri whanaunga ki roto o Ngapuhi.

Kaati kawea mai te riri a te manu waitai
Ki roto o Ngapuhi Kowhaorau ee …. i.
E kore au e mutu te tu ki te pakanga
Kia kai rano au i te rere ua o te po—
Katahi ano ka mutu te tu ki te pakanga,
Ka hinga hoki ra te wao nui o Tane ki raro naai.