Go to National Library of New Zealand Te Puna Mātauranga o Aotearoa Go to Te Ao Hou homepage
No. 14 (April 1956)
– 4 –

Rangatira ana tera a Te Ao Hou i tenei o ona putanga ki te panui i te rarangi ingoa o te hunga i riro i a ratou nga koha mo te whakataetae tuhituhi. Kei te maringi mai te korero i nga pene a te iwi Maori o te Motu kaingakau ki tenei mahi ki te tuhituhi. He nanakia nga mea kua taia, a i te pai o etahi whakawhiwhia ana ki nga honore mo nga whakataetae tuhituhi a Te Ao Hou.

He iwi korero, he iwi tuhituhi te Maori o namata mai. Tirohia te pukapuka a Hori Kerei, Nga mahi a nga tupuna, na te pai o te whakatakoto o te korero a te Maori i kaingakautia ai e nga whakatupuranga. Kei nga pukapuka pera me Te Waka Maori, Te Hokioi, Te Wananga, Te Pipiwharauroa, Te Toa Takitini, a te pukapuka a Te Ropu Whakakawhaiti i nga ahuatanga mo nga iwi o te Moana nui a Kiwa, ka kitea te tohungatanga o te Maori ki te whakatakoto korero.

Kei te reo Pakeha etahi o nga korero tohunga a te Maori i enei ra. Otira kei te puta tonu mai ki Te Ao Hou etahi korero tohunga i te reo Maori, a ko te tumanako kia kaha tonu mai taua hunga ki te tuhi korero mo ta tatou pukapuka kua momohanga hoki te hunga tohunga ki te whakatakoto korero ki te reo Maori.

Ko te whakaaro o Te Ao Hou he mea tino nui te tuhi korero. He tokomaha nga Maori whai whakaaro kei te haere nga whakaaro ki te rapa huarahi e ora ai to ratou iwi. Ma nga whakaaro o etahi kua takoto ki nga pukapuka e whakapakari aua whakaaro hohonu. Kei aua pukapuka nga korero tohunga mo nga mahi o namata me nga mahi hoki e ora ai te tangata i roto o enei ra.

Ina noa ake nga kaupapa mo te tuhituhi. Noho noa ai te tangata ka pupu te aroha ki tana wahine ki ana tamariki ka mau ki te pene ka tito i tana waiata aroha, otira ki nga tipuna Maori ka pupu noa ake te waiata. Ko nga korero o namata he mea tohu ki te waiata no muri noa nei i tuhia ai. Kaore ano kia mimiti te puna o te korero, e tika ana ma te Maori ano e tuhi nga korero mo o ratou na tupuna.

Kei te tono atu a Te Ao Hou kia tukua mai a koutou korero hei korero ma te tokomaha.

Kei te tuhia he wahanga korero e manakohia e te raugatahi. Ka taia nga kupu o nga haka penei me “He putiputi pai” me era tu haka a ka nekehia ake te wahanga o nga tuhituhi mo nga takaro.

Kei te takare mai te iwi mo nga korero kei Te Ao Hou, na reira tukua mai he korero.