Go to National Library of New Zealand Te Puna Mātauranga o Aotearoa Go to Te Ao Hou homepage
No. 13 (December 1955)
– 14 –
 

ka rere tika mai koe ki waho, ka tutaki atu ai e taua te kuaha.”

Ka mutu nga tohutohu iho a Tamatekapua ki te teina, ko te hekenga atu ki raro ka haere ki te roro o te whare noho tatari mai ai ki te teina.

Te rongonga o Uenuku me Toi me to raua iwi i a Whakaturi ae korero iho ana, a whakahawea ana ki a ratou me a ratou haka, katahi ka mea—

“Tena koe tukua iho te tangata e kiki iho nei te waha he mohio ia ki te haka, he aha ranei?”

Katahi ka tukua iho. A na te mea ano ka ata rite katoa nga mea katoa i akoakongia atu ra e te tuakana e Tamatekapua ki a ia, ko te tarapeketanga, tau rawa atu i te tuarong o te whare, me te pukana me te whaterotero, me te haere te arero, me te whakatumatuma atu ki te aronga atu ki a Toitehuatahi. Katahi ka rua nga tarapeketanga, i te toru, tau rawa mai ki te ahi a nga motumotu o te ahi kei roto i te whare. Kapo tonu ki tetahi o nga motumotu o te ahi e ka ra i roto i te whare, kua tuhera te kuaha i a Tamatekapua, tau rawa atu a Whakaturia i waho, Tutakina mai te kuaha herehere rawa.

Katahi ka toua te motumotu e ka tonu ra, i kapohia iho ra e Whakaturia, ki nga tuparu rau rakau o te whare, ko te muranga i mura ai, pau atu a Toi me Uenuku me to raua iwi i te ahi.

Ki tetahi korero, ko Uenuku me Toitehuatahi me etahi o te iwi i puta ki waho ka ora. Ko etahi ano i pau atu i te ahi.

Ka mutu i konei.

He kupu Whakamarama:

Mehemea ki te tae ki Ohinemutu, Rotorua, ka tomo ki roto i a Tamatekapua whare runganga o Ngati Whakaue, kei runga o te pou tokomanwa o taua whare he upoko Kuri, koia tena, te whakamahara mo Potakatawhiti te Kuri mokai kua korerotia ake ra tona pakiwaitara.