Go to National Library of New Zealand Te Puna Mātauranga o Aotearoa Go to Te Ao Hou homepage
No. 11 (July 1955)
– 44 –

TE PUTAKE I NOHO AI TE
KEA I RUNGA MAUNGA

I nga wa o mua, i noho te Kea me te Kaka i roto i te ngahere. He korerorero tonu ta raua mahi, a kahore i tau o raua arero pera ano hoki me etahi atu kaka.

I runga i tona pakiki, tirotiro ai te Kea ki nga mahi a etahi atu o nga manu.

I tetahi ra, i tutaki te Kea me te Kaka i tetahi manu tau hou, a ko te manu nei he Kakapo.

Katahi ka mea te kakapo ki ana manuhiri. “Tena korua, ko aku whakaaro i mua o to tatou tutakitangi, ko au anake te kaka i roto i te ngahere nei.”

I muri iho o etahi korerorero, ka mea te Kea ki te Kakapo.

“Kahore koe i te kaka, ko tou ahua ano he ruru, a, puta mai ai koe i te po pera ano me te ruru.”

Katahi te Kaka ka whakaputa i ona whakaaro mo tenei take, a ki ana he kaka ano te kakapo nei, no te mea, pera ano me te kaka, riro ai ma tona ngutu e piki rakau ai a ia.

Kahore te Kea i whakaae, a, i muri iho o tetahi tautohe nui, ka mea a ia, kahore a ia e noho i roto i te ngahere, mehemea ka noho hoki te manu nei, tetahi wahi ona he kaka, tetahi wahi he ruru. Katahi te Kea nei ka whakarere i te ngahere, a, e noho nei i runga maunga.

Kei te mau tonu tona ahua pakiki, no te mea, haere ai a ia ki nga puni o nga hepara, me nga tangata piki maunga tirotiro haere ai.