HE WAIATA A
HINETA WHIRIRANGI

Na R. T. Kohere i tuhituhi

E hika ma e, utaina mai ra, e,
Ki runga i te kanoi, kia tika ko te homo, e;
Ka haere ai ra i te tira o Karika, e,
I te mate i whanga, ka eke mai kai runga e;
Naku i moumou, na Pawa i whakarere, e;
Koia Maroheia e awhi mai ra Ihutoto, e.
E hika ma e, kai rawa koutou i ahau e,
Kia horo te tahuti nga tai ka taui, e,
I waho o te Ihiwa, kei te whaonga o te maara na Tangaroa,
Kei nga ihu waka taurua, kei o tipuna,
Kia rere koe, e tama, tu ana i te hamanu, e.
Hei konei tonu au kairangi atu ai
Ki te ao e rere mai ra runga i Totara, e:
Kai raro aku mea e aroha nei au, e.
I moea ki te po, he tamaiti wairua
E moe nei maua, e.
He pani au, e hika ma, kia kawea ki te waiope ai, e:
He matihe ia nei, e hoki mai ki te ihu, e?

Nga Whakamarama:—

He tino waiata tenei na Ngati-Porou, he tangi na Hinetawhirirangi mo te Hamaiwaho. (Tirohia nga whakamarama i te Reo Ingarihi.)

Tira o Karika, he tira haere ki te po.

Te Ihiwa, he toka kei waho o Whangoakeno, East Island.

Maara o Tangaroa, ko te moana.

Totara, he hiwi e tata ana ki Te Araroa, e whakahuatia ana ano i te tangi mo Te Whetu-kamokamo.