Go to National Library of New Zealand Te Puna Mātauranga o Aotearoa Go to Te Ao Hou homepage
No. 4 (Autumn 1953)
– 20 –
 

Katahi ka mau te iwi ki te ahi, he rama, ara, ko a te Maori rama, he ngapara. Katahi ka tahuna, ka ka; katahi ka haere rauna noa te whare, rite rawa nga tangata, katahi ka karanga:—‘Tahuna!’ Katahi ka tungia te rama; tana kainga a te ahi! ka rongo te ngarara i te mahana o te ahi, katahi ka kaha rawa te tangi o te ihu, e tia he haruru tai moana! No te mea ano ka horo te ngarahu o te whare ki runga i te ngarara, katahi ka ohooho noa ake, kua ngau katoa te ahi i taua koringa.

Katahi te wahine ka karanga, ‘Werohia! Werohia!’ Katahi ka werohia; ka mate te ika nei, ka tika te tao ki te hiku, ka motu te hiku; ka rere, noho rawa atu i roto i te roto iti; engari kaore te hiku i whai mahi mana. E hoa ma! ka mate tenei nanakia. I muri, ka hapu te wahine, ka whanau kotahi te tamaiti, kotahi taha ngarara, kotahi, he kiri tangata. Ko nga waewae, he ngarara katoa, me te upoko, me te ihu, me te waha, me nga karu, ko te kiri anake i riro i te tangata.

E hoa ma, ko taua tamaiti i mate, kaore he waha; ko te ahua kau o te waha i hanga, no reira i mate ai. Ka mutu tenei korero patunga ngarara.