Go to National Library of New Zealand Te Puna Mātauranga o Aotearoa Go to Te Ao Hou homepage
No. 2 (Spring 1952)
– 33 –

Oho ana te mauri i te rongo kua moe a Te Puea Herangi i te moenga roa, i mate ki tona kaenga i Ngaruawahia i te po o te Ratapu te 12 o nga ra o Oketopa, 1952.

I whanau a Te Puea ki Whatiwhatihoe i te tau 1884, he mokopuna na Tawhiao te tuarua o nga kingi o Waikato. He wahine wehi he wahine kaha ki te hiki i nga mahi mo ona iwi a he wahine i paolo ona ronga ki te Ao nui tonu i runga i ana mahi.

Kei te tangi te Ao Maori me te Ao Pakeha mo tenei wahine, mo ana mahi nunui a kitea ra ka pau ano ona kaha i te mate kawe tonu tona koiwi. Ko ia te manawa o Waikato nana i tuhonohono nga iwi, nga mana ariki i mau tonu ai te taonga a Waikato tona ariki nui te Kingi, a nana i whakatangatanga nga kuaha o nga whare pa o Waikato.

E takoto mai nei a Turangawaewae me ona whare, a Mahinarangi a Turongo nga tipuna o Waikato na Te Puea enei hei taonga whakahirahira mo ona ariki hei pohatu whakamaharatanga hoki ki a ia te wahine nana i matakite enei taonga.

I whakapaua e Te Puea ona kaha ki te whakapai i nga whenua o Waikato i raro i te kaupapa ahuwhenua a Ngata. I uhia te kahu rangatira o Te Kingi te C.B.E. ki runga i a ia i te tau 1937.

Kua puta nga tangi a te Motu ki to tatou kuia a kei te whakaeke nga iwi ki tona marae ki Turangawaewae ki te riringi i o ratou roimata te Pakeha me te Maori.

Haere e kui, haere. Haere ki o matua tipuna i te po.