Go to National Library of New Zealand Te Puna Mātauranga o Aotearoa Go to Te Ao Hou homepage
No. 1 (Winter 1952)
– 48 –
 

Pewhea ai te whakapau a te Kawanatanga i nga moni e ki nei koe hei whakapiki i te Iwi Maori ki nga taumata o te Ao Pakeha?

Ina ra nga mahi a te Tari Maori hei awhina i te iwi Maori. Ko te awhina i nga mahi ahuwhenua, i nga mahi whare, i te tieki i nga moni a nga Maori, ko te whakatopu i nga paanga whenua a ko te tuku moni tapiri hei hanga whare huihuinga mo nga Maori ki nga taone.

Tera ano e rite te Maori ki te Pakeha?

E kore ra. Ina ke te ahua me rite te noho te mahi a te Maori ki ta te Pakeha a me ahua tauriterite ano o raua whakaaro mo nga ahuatanga o te Ao Pakeha. Kua tokomaha nga Maori kua eke ki nga taumata o te Ao Pakeha a meake nei ko etahi atu. Ka taea e te tokomaha noa atu te piki aua taumata waiho ma te wa e waitohu.

Ko te hiahia ranei o te Tari Maori me whakapakeha te Maori?

Kaore ko ta te Tari Maori he manaaki i nga taonga Maori i nga tukutuku i nga whakairo a i nga mahi haka. Ina nga whare whakairo o te motu na te moni Kawanatanga. Kei te Tari Maori te mana whakahaere nana i awhina te waihangatanga te whakaoraoratanga ranei.

He aha nga koha ki Niu Tireni o nga moni e whakapaua nei e te Tari Maori?

Ehara ra i te mea na te whakaaro noaiho o te Tari Maori i whakapaua peneitia ai nga moni a te Kawanatanga he whakaaro whanui. Kei te piki te tokomaha o te iwi Maori inaianei tokoono nga Maori ki te kotahi rau pakeha meake nei tera e piki ki te tokoiwa Maori ki te rau Pakeha. Mehemea ka tukua tenei iwi tokoiti kia noho ware noa ai i roto whare kanukanu i roto i te paru, tena te wa ka tipu hei iwi wheru a ma te moni nui noa atu i tenei e whakapaua nei e te Kawanatanga e whakatikatika ta ratou noho.

Ehara ia tenei i te poipoi i te Maori?

Ko nga awhina e whaiti and ki nga take Maori. Kei te Maori ana take hei awhinatanga ma te Kawanatanga, penei me te mahi o ona whenua, te whakapai i nga marae, te whakapai i nga whare kanukanu na te kore moni ra i pera rawa ai te he. Kei te Kawanatanga nga awhina mo enei take.